Miloj da Reddit-komunumoj morgaŭ ĉesos esti alireblaj por protesti kontraŭ la decido pagigi milionojn da dolaroj al programoj, kiuj uzas la API. Pro tiu politiko multaj programoj ne plu funkcios.

Tamen, kvankam iuj homoj rekomendas, ke oni ĉesu uzi Reddit, la protesto daŭros nur du tagojn. La problemo de portempa bojkoto estas, ke ĝi sendas jenan mesaĝon al la proprietuloj: multaj homoj koleras, sed post du tagoj revenos kaj ni daŭre gajnos monon. Reddit ĉesis esti libera programo antaŭ jaroj kaj ne ĉesos cenzuri informojn, kiujn ili ne ŝatas.

Mi subtenas la bojkoton al Reddit, sed mi pensas, ke ĝi ne devus daŭri nur du tagojn; ĝi devus esti porĉiama. Ekzistas kelkaj programoj similaj al Reddit, kiuj estas liberaj kaj kiuj respektas la privatecon de siaj uzantoj: Lemmy, /kbin, Postmill, Lobsters, Tildes...

Lemmy kaj /kbin, malkiel Reddit, estas liberaj kaj federaciitaj, do la administrantoj de nodo ne povas cenzuri informojn de nodoj, kiujn ili ne regas, aŭ trudi ion al ili; ĉiu nodo havas sian politikon.

Ni estas koloniitaj. La plej grandaj teknologiaj firmaoj, kun la kompliceco de Usono, kontrolas la ciferecan mondon. La plejmulto de komputiloj (tiuj kiuj uzas AMD- aŭ Intel-procesorojn) povas esti spionataj kaj fore kontrolitaj danke al universala kaŝenirejo¹, pere de la jura subteno de la USA PATRIOT Act². Ni ankaŭ estas spionataj per poŝtelefonoj³, gvatantaj filmiloj, per la banka sistemo, ktp.

Ni estas la malamikoj

WikiLeaks⁴ kaj Edward Snowden⁵ montris al la mondo la gvatadon kaj aliajn abomenaĵojn faritajn, precipe per la publikigo de konfidencaj dokumentoj. La kreinto de WikiLeaks estas en malliberejo pro sia raportado pri la situacio kaj Snowden estas ekzilita en Rusio. Sed vi ne devas krimi por esti malliberigita aŭ persekutata, kiel bone scias la programisto de liberaj programoj kaj defendanto de la privateco Ola Bini⁶.

Se vi nun legas ĉi tiun artikolon, la (usona) Nacia Sekureca Agentejo probable konsideras vin kiel ekstremisto, same kiel okazis al la legintoj de Linux Journal⁷. Bonŝance estas pli GNU/Linuksaj ekstremistoj hodiaŭ. Firmaoj kiel Microsoft kutimis diri, ke GNU/Linukso estis kancero⁸; nun ili «amas Linukson»⁹. Liberaj programoj kaj privateco gajnis popularecon kaj adeptojn, sed la plejmulto de la problemoj antaŭe menciitaj ankoraŭ ekzistas.

Malkoloniigo

Kvankam la plejmulto de la homoj vivas koloniitaj fare de proprietaj kaj spionadaj teknologioj, estas liberaj alternativoj, kiuj lasas al ni havi pli da privatecon kaj kontrolon; estas projektoj de liberaj aparataroj kaj liberaj programoj, kiuj donas al ni la liberecojn, kiujn la grandaj firmaoj kaj registaroj rifuzas al ni.

Se ni volas akiri pli da privateco kaj libereco, ni ankaŭ devas ĉesigi firmaojn kiel Google, Meta, Apple kaj Microsoft, kiuj neniel defendas la privatecon kaj liberajn programojn. Por fari tion ni devas anstataŭigi iliajn spionajn kaj proprietajn programojn per liberaj kaj malcentraj alternativoj. Ni ankaŭ devas subteni projektoj de liberaj aparataroj.

Tamen la sistemo estas kontraŭ ni. En la plejmulto de la landoj oni uzas la monon akiritan per impostoj por pagi permesilojn de spionaj programoj kaj krei ciferecan kvatadan sistemon. Maniero batali kontraŭ tio estas pagi kiel eble malplej impostoj (pagante per kontanta mono kaj uzante anonimajn ĉifrovalutojn kiel Monero¹⁰, ekzemple) kaj denunci la problemon.

La Roma Imperio ne disfalis en du tagoj. Nek la ĉinia nek la usona cifereca imperio faros tion. Ni havas la povon krei kaj instigi liberigajn elektojn.

Imagu drogon, kiu pliigas vian streson, anksion kaj kiu mense lacegigas vin; drogon, kiu ne nur dependigas vin, sed kiu ĉiutage lasas vin sen energion. Kiu uzus tiun drogon? Preskaŭ ĉiuj. Tiu drogo nomiĝas TikTok.

Ĉu vi sentas vin sola? Ne zorgu, en la komunumo de tendencoj kaj defioj vi havos «amikojn», kiuj ege volos vidi kiel vi agas kiel idioto aŭ vi ridinde kaj hontinde dancas.

Adoleskantoj, infanoj kaj plenkreskuloj stulte agas pro socia aprobo. Sed tio ne damaĝas iun, ĉu? Estas defioj kiel metu lesivojn en la okulojn por vidi, se ilia koloro ŝanĝiĝas; sin ŝminki per oranĝa ŝimo; faligi iun per la piedoj dum ri saltas, kiel en la jena video:

Homoj mortis farinte stultajn defiojn. Kiu kulpas? TikTok ne devigas al vi uzi la platformon, sed en mondo ege stresa, kiu kaŭzas angoron kaj estas tro-dozo de dopamino, kun homoj kiuj urĝe bezonas socian aprobon, ekzistas homoj, kiuj rifuĝas en toksa medio. Estas homoj, kiuj sentas la neceson montri al aliuloj, ke ili feliĉas, ke ili havas mirindan vivon... La realo estas tre malsama.

Pro familiaj konfliktoj, problemoj en la lernejo aŭ en la laborejo, homoj rifuĝas en TikTok, kiu unuavide ne ŝajnas drogon, por forgesi siajn problemojn. Tamen TikTok agas en la mezolimba vojo, aktivante la sistemon de cerba rekompenco. Se vidi stultajn videojn igas, ke vi forgesu viajn problemojn kaj ankaŭ donas al vi plezuron, vi vidos stultajn videojn, kaj via cerbo volos fari tion denove, do vi vidas alian videon kaj via cerbo produktas dopaminon. Iom post iom la dopaminerga sistemo adaptiĝas: unue sufiĉos al vi vidi videon, sed poste vi bezonos vidi du, tri, kvar... Por atingi la saman plezuran nivelon kiel en la komenco vi devos vidi pli kaj pli da videoj.

Aliflanke la agoj, kiuj sane pliigas la dopaminon, kiel fari ekzercojn kaj sane manĝi, estas tedaj. Oni ne povas kompari tiujn agojn kun tio, kion la grandaj firmaoj ofertas, kio maksimume pliigas vian dopaminon, sen nenia peno via, ĝis vi estas dika, elĉerpita...

Per sociaj retejoj kiel TikTok ne necesas, ke vi elektu tion, kion vi volas vidi, ĉar la algoritmo elektas por vi la specon de merdo, kiun vi ŝatas, donante ĝin al vi, sen ke vi devos movi unu fingron. Ĝi faras tion senkoste, ĉar vi estas la produkto: ĝia negoco konsistas en teni vin dependa antaŭ ekrano, por ke vi vidu la kiel eble plej grandan nombron de reklamoj. Kial ili faras tion? Ŝanĝante iom post iom viajn agojn kaj vian pensmanieron, alivorte igante vin dependa, sen ke vi konsciu. Vi ne povas vidi kiel funkcias la algoritmo, kiu estis hiperoptimumigita por dependigi vin, sed vi povas vidi la sekvan videon kaj fari aliajn aferojn, kiuj igu, ke aliaj homoj restu pli da tempo en la platformo, kiel komenti kaj ŝati. Vi estas uzato, ne uzanto.

Pro tio vi faris preskaŭ nenion dum tutaj tagoj kaj vi ĉiam estas tiel laca, malgaja, enuigita, stresita, korpremita, senmotivigita, iritita, malfortigita... mania.

Ĉu TikTok malsanigas homojn? TikTok estas reflekto de nia socio, socio malsana, trompita per malvera feliĉo de la sociaj retejoj, laca de la mondo. La sociaj retejoj scias multajn aferojn pri vi, sed vi nenion scias pri ili, ĉar ili estas malliberaj programoj. Ekzistas liberaj sociaj retejoj, sed ili ankaŭ povas esti tre toksikaj.

Por liberigi vin de la dependeco vi povas klopodi la dopaminan sentoksigon, tio estas, malpliigi la uzadon de sociaj retejoj kaj fari aferojn, kiuj postulas penon kaj ne donas al vi tujan plezuron. Por ke tio estu pli facila, oni povas fari tion iom post iom.

Kompreneble la sociaj retejoj ankaŭ povas esti utilaj, sed oni devas modere uzi ilin. Plej bone estus, ke ili estu liberaj kaj privatecrespektemaj. Ili ne devas instigi dependecon, tion kion TikTok, Instagram, YouTube kaj aliaj sociaj retejoj faras.