Reddit perdas uzantojn kaj monon, ĉar ĝi ignoris la plendojn de siaj uzantoj

Reddit pagas la prezon ignori la proteston de siaj uzantoj kontraŭ siaj lastaj ŝanĝoj.

Unuflanke multaj homoj moviĝis al aliaj platformoj kiel Lemmy, kiu triobligis siajn uzantojn en mallonga tempo:

Aliflanke la retejo de Reddit ĉesis funkcii pro protestoj, en kiuj pli ol 7000 diskutejoj iĝis nealireblaj¹ kaj kvar milionoj da homoj ĉesis uzi la retejon². Klopodante minimumigi la damaĝon, Reddit forigis el la teamoj de administrantoj kelkajn administrantojn, kiuj protestis, anstataŭigante ilin per obeemaj administrantoj³.

Tamen iuj diskutejoj ankoraŭ estas malfermitaj. Estas ankaŭ uzantoj, kiuj alŝutas senrilatan enhavon al la retejo por malpliigi la valoron de la firmao kaj daŭrigi la proteston. Ekzemplo estas la diskutejo r/pic, kiu estas nun «ejo por seksallogaj bildoj de John Oliver». Krome, kelkaj homoj plenigas la retejon per hazardaj videoj⁴.

Ĉi tiu malkontenteco ne estis ignorita de kelkaj reklamfirmaoj, kiuj ĉesigis siajn kampanjojn⁵.

Administrantoj senpage laboras por la firmaoj; ili ne estis aŭskultitaj. La uzantoj, kiuj estas esencaj, ankaŭ ne estis aŭskultitaj. La rezulto estas katastrofa por Reddit: perdo de uzantoj, perdo de reklam-enspezo kaj pliiĝo de senutila enhavo.